ജപ്പാൻ ദിനങ്ങൾ (Part-3) ..... ക്യോട്ടോ, ടൊയാമ

ക്യോട്ടോയിലെ നിജോ റെയിൽവേ സ്റ്റേഷനിൽ നിന്നും ഏകദേശം ഒരു കിലോമീറ്റർ അകലെയാണ് ഞങ്ങൾ ബുക്ക് ചെയ്തിരിക്കുന്ന ഹോട്ടൽ. റെയിൽവേ സ്റ്റേഷനിൽ നിന്നും JR ബസ്സ് സർവീസുകൾ അരമണിക്കൂർ ഇടവിട്ട് ആ ഭാഗത്തേക്ക് ഉണ്ട്. ജപ്പാൻ റെയിൽവേയുടെതാണ് ഈ സർവീസും, JR പാസ് ഉപയോഗിച്ചുകൊണ്ട് ഫ്രീ ആയി യാത്രചെയ്യാം. ബസ് സ്റ്റേഷൻ കണ്ടുപിടിക്കാനുള്ള ചെറിയ ബുദ്ധിമുട്ടും ആശയ വിനിമയത്തിന്റെ ചെറിയ പ്രശ്നങ്ങളും കാരണം JR ബസ്സുകളുടെ സമയം കൃത്യമായി മനസിലാക്കാൻ സാധിച്ചില്ല. ജപ്പാൻകാർ ഇംഗ്ലീഷ് ഭാഷ ഉപയോഗിക്കുന്നതിൽ കുറച്ചു പിന്നിലാണ്. എങ്കിലും അവരെക്കൊണ്ട് ആകുന്ന വിധത്തിൽ അവർ സഹായിക്കുവാൻ ശ്രമിക്കും. ജപ്പാനിൽ ടാക്സികൾ നല്ലൊരു തുക ചാർജ് ആയി ഈടാക്കും, അതിനാൽ നടത്തം തന്നെ ശരണം. ഞങ്ങൾ ആ ഒരു കിലോമീറ്റർ ദൂരം സാധനങ്ങളും എടുത്തുകൊണ്ട് നടന്നു. ബസ്സിന്റെ സ്റ്റോപ്പുകളും സമയവും മറ്റും ഞങ്ങൾ ആ യാത്രയിൽ കണ്ടുവച്ചു. ഓരോ ബസുകളുടെയും സമയം, ആ ബസ്സ് ഇനി നമ്മൾ നിൽക്കുന്ന സ്റ്റോപ്പിൽ എത്തുവാൻ എത്ര സമയം എടുക്കും, ഏതൊക്കെ സ്റ്റോപ്പുകൾ ആണ് ആ ബസ്സിന് ഉള്ളത് - തുടങ്ങിയ വിവരങ്ങൾ എല്ലാം ബസ് സ്റ്റോപ്പിലെ ചെറിയൊരു ഡിജിറ്റൽ ഡിസ്പ്ലേയിൽ എഴുതികാണിച്ചുകൊണ്ടിരിക്കും. ഇങ്ങനെയുള്ള വിവരങ്ങൾ കൃത്യമായി നൽകുന്നത് യാത്രക്കാർക്ക് വളരെയധികം സഹായകരമാണ്. മറ്റൊരു രാജ്യത്തും ഇങ്ങനെയൊരു സൗകര്യം ഉള്ളതായി കണ്ടിട്ടില്ല. വലിയ ബസ് സ്റ്റേഷനുകളിൽ ഈ സൗകര്യം ഉണ്ടെങ്കിൽ തന്നെ ഇതുപോലെയുള്ള ചെറിയ ബസ് സ്റ്റോപ്പുകളിൽ ഇങ്ങനെയുള്ള സംവിധാനം ഉള്ളത് ഒരു പക്ഷെ ജപ്പാനിൽ മാത്രം ആയിരിക്കാം.

പഞ്ചാബ് അമൃത്സറിലെ സുവർണ ക്ഷേത്രത്തിനു സമാനമായി ഒരു ഗോൾഡൻ ടെംപിൾ ജപ്പാനിലും ഉണ്ട് - കിൻകാകൂജീ ഗോൾഡൻ ടെംപിൾ. ഇന്നത്തെ ഞങ്ങളുടെ പ്രധാന കേന്ദ്രം അതാണ്. JR ബസ്സിൽ കയറി ഞങ്ങൾ അവിടേക്ക് യാത്ര തിരിച്ചു. ക്യോട്ടോവിലെ പ്രധാനപ്പെട്ട ഒരു ടൂറിസ്റ്റു സ്ഥലം! വെള്ളത്തിൽ ഉയർന്നു നിൽക്കുന്ന ഒരു ബുദ്ധ ക്ഷേത്രമാണ് കിൻകാകൂജി ഗോൾഡൻ ടെംപിൾ. തൊട്ടടുത്തുതന്നെ ഒരു ചെറിയ വനമുണ്ട്. വളരെനേരത്തെ തന്നെ എത്തിയിരുന്നെങ്കിലും അപ്പോഴേക്കും തിരക്ക് തുടങ്ങിയിരുന്നു. ടിക്കറ്റ് എടുക്കാൻ തന്നെ അരമണിക്കൂർ വേണ്ടി വന്നു. ആ സുവർണ ക്ഷേത്രവും പരിസരവും കണ്ടു തിരികെ ഇറങ്ങി ബസ്സ് സ്റ്റോപ്പിലേക്ക് നടക്കുമ്പോൾ കണ്ട മെക്ഡൊണാൾഡ്സ്(McDonald’s) നിന്നും ഞങ്ങൾ കോൺ ഐസ്ക്രീമുകൾ വാങ്ങി കഴിച്ചു. ലോകത്ത് എല്ലായിടത്തും മെക്ഡൊണാൾഡ്സിൽ ഏറ്റവും വില കുറച്ചു ലഭിക്കുന്ന സാധനം....! അവിടെ കോൺ ഐസ്ക്രീമുകൾക്ക് 65 ഇന്ത്യൻ രൂപ വില വരും. ഇതേ കോൺ ഐസ്ക്രീം ഇന്ത്യയിൽ 15 രൂപയും, മലേഷ്യയിൽ 28 രൂപയുമാണ്.

ജപ്പാനിൽ പബ്ലിക് ടോയ്ലെറ്റുകൾ എവിടെയും കാണാം. വളരെ വൃത്തിയുള്ളതും കാണാൻ ഭംഗിയുള്ളതുമായ ടോയ്ലെറ്റുകൾ. കൂടാതെ മനോഹരമായ ഇരിപ്പിടങ്ങളും ധാരാളം ഒരുക്കിയിരിക്കുന്നത് കാണാം. അതിലെല്ലാമുപരിയായി മറ്റൊരു കാര്യം കൂടി ഉണ്ട് - ജപ്പാനിലെ പബ്ലിക് ടോയ്ലെറ്റുകൾ സൗജന്യമായി ഉപയോഗിക്കാവുന്നതാണ്, യാതൊരു നിരക്കും ഈടാക്കുകയില്ല. മിക്ക വിദേശ രാജ്യങ്ങളിലും പണം നൽകി ഉപയോഗിക്കുന്ന പബ്ലിക് ടോയ്ലെറ്റുകൾ ആണ് ഉള്ളത്. ഞങ്ങളുടെ ഹോട്ടലിനടുത്തായി ഒരു കാസിൽ ഉണ്ട്. ഞങ്ങൾ മടങ്ങിയെത്തിയപ്പോൾ പ്രവേശന സമയം കഴിഞ്ഞിരുന്നു, അതിനാൽ ഞങ്ങൾ അതിന്റെ പുറത്തുകൂടി വെറുതെ നടന്നു. നേരം ഇരുട്ടിത്തുടങ്ങിയപ്പോഴേക്ക് ഞങ്ങൾ അവിടെനിന്നും ഹോട്ടലിലേക്ക് മടങ്ങി.

ഹിഡാ എക്സ്പ്രെസ് ടക്കയാമ വഴിയാണ് പോകുന്നത്. ക്യോട്ടോയിൽ നിന്നും രണ്ടരമണിക്കൂർ സമയം എടുത്ത് ടൊയാമയിലെത്തുന്ന അതിവേഗ ട്രെയിനുകളെക്കാൾ നാലരമണിക്കൂർ സമയം എടുത്ത് അവിടെയെത്തുന്ന ഹിഡാ എക്സ്പ്രസ്സ് ടൂറിസ്റ്റുകൾക്ക് വളരെ പ്രിയപ്പെട്ടതാണ്. പ്രകൃതിരമണീയത ആസ്വദിച്ചുപോകുവാൻ കഴിയുന്ന തരത്തിലാണ് ഹിഡാ ട്രെയിനിന്റെ രൂപകൽപ്പന. ഇതിൽ മറ്റു ട്രെയിനുകളെ പോലെയുള്ള ജനാലകൾ അല്ല, വൈഡർവ്യൂ വിൻഡോസ്(Wider View Windows) ആണ്. അതുകൊണ്ടുതന്നെ വഴിയിലെ കാഴ്ചകളെല്ലാം വിശാലമായി ആസ്വദിക്കുവാൻ കഴിയും.താഴ്വരകൾക്കും വെള്ളച്ചാട്ടങ്ങൾക്കും ഇടയിലൂടെ മലനിരകളും ഡാമുകളും കണ്ടുള്ള യാത്ര വർണനകൾക്കപ്പുറത്താണ്. നാലരമണിക്കൂർ ഉടനെയെങ്ങും കഴിഞ്ഞുപോകരുതേ എന്നുപോലും ആഗ്രഹിച്ചുപോയ നിമിഷങ്ങൾ! അതിനാൽ തന്നെ നല്ലതിരക്കാണ് ഇതിൽഅനുഭവപ്പെടുന്നത്. തിരക്കില്ലാത്ത മറ്റുട്രെയിനുകളും ഉണ്ട്, അവയിൽ മുൻകൂട്ടി സീറ്റ് റിസെർവ് ചെയ്യണം എന്ന് നിർബന്ധമില്ല. ടാക്കയാമ വരെയേ ഈ ഹിഡാ എക്സ്പ്രെസ് ഉള്ളു. അതിനുശേഷം അവിടെ നിന്ന് മറ്റൊരു ട്രെയിൻ പിടിക്കണം, ടൊയാമയിൽ എത്താൻ.

ജപ്പാനിലെ ഞങ്ങളുടെ ഏഴാം ദിവസം വളരെ സന്തോഷകരമായിട്ടാണ് തുടങ്ങിയെതെങ്കിലും പ്രഭാതഭക്ഷണം കണ്ടപ്പോൾ ചെറിയ നിരാശയൊക്കെ തോന്നാതെയിരുന്നില്ല. സൗജന്യ പ്രാതൽ ആയിരുന്നതിനാൽ ഭക്ഷണ സമയം തലേദിവസം രാത്രി തന്നെ കൗണ്ടറിൽ ചോദിച്ചു മനസ്സിലാക്കിയിരുന്നു. എന്നാൽ സൂഷി,സഷിമി പോലെയുള്ള പാചകം ചെയ്യാത്തതും പാതി വേവിച്ചതുമൊക്കെയായ മാംസാഹാരം തന്നെയായിരുന്നു പ്രാതലിനും; പിന്നെ തണ്ടൂരിചിക്കൻപോലെയുള്ള വിഭവങ്ങളുമുണ്ട്. എന്നും രാവിലെ പുട്ടും കടലയും ഇഡ്ലിയും ചമ്മന്തിയുമൊക്കെ കഴിക്കുന്ന നമ്മൾക്ക് രാവിലെ തന്നെ ഇതൊന്നും ഇറങ്ങില്ലല്ലോ. അതുകൊണ്ട് കോൺഫ്ലെക്സും ബ്രെഡ്ഡും ബട്ടറും ആക്കി അന്നത്തെ ഞങ്ങളുടെ ബ്രേക്ക്ഫാസ്റ്റ്.

അന്നത്തെ യാത്ര ഒരു ഹിൽസ്റ്റേഷനിലേക്കാണ്. പഴയ രീതിയിലുള്ള ടോയ്ട്രെയിനിൽ കാട്ടിലൂടെ സഞ്ചരിച്ചാണ് ഹിൽസ്റ്റേഷനിൽ എത്തുന്നത്. ടോയ്ട്രെയിനിൽ കയറുന്നതിനു മുൻപേ ബുള്ളറ്റ്ട്രെയിൻ കയറി വേണം അവിടെ എത്താൻ. ഞങ്ങൾ നാലുപേരും ബുള്ളെറ്റ്ട്രെയിനിൽകയറി ഒരു സ്റ്റോപ്പിൽ ഇറങ്ങി, തൊട്ടടുത്ത പ്രൈവറ് റെയിൽവേ സ്റ്റേഷനിലേക്ക് പോയി - ഇനിയുള്ള യാത്ര പണം നൽകിയാണ്. അവിടെ നിന്നും മറ്റൊരു ട്രെയിനിൽ കയറി ടോയ്ട്രെയിൻ സ്റ്റേഷനിൽ എത്തി. വളരെ ചെലവേറിയ ഒന്നാണ് ഈ ഹിൽസ്റ്റേഷൻ യാത്ര. ഇതിനുമാത്രം ഒരാൾക്ക് ഏകദേശം 6000 രൂപ ചെലവ് വരും. രണ്ടു തരത്തിലാണ് ഇതിലെ ടിക്കറ്റ് - ഓപ്പൺ ക്യാബിൻ , ക്ലോസ്ഡ് ക്യാബിൻ. നന്നായി തണുക്കുമെന്നറിയാമായിരുന്നെങ്കിലും കൂടുതൽ ആസ്വദിച്ച് കാണാൻ ഞങ്ങൾ ഓപ്പൺ ടിക്കറ്റ് ആണ് എടുത്തത്; ക്ലോസ്ഡ് ക്യാബിൻ ടിക്കറ്റ് ചാർജും കൂടുതലാണ്. ഇടുങ്ങിയ വഴിയിലൂടെ വനത്തിനുള്ളിലെ നല്ല തണുപ്പത്തുള്ള യാത്ര.!! പലതരം വലിപ്പത്തിലുള്ള പാലങ്ങൾ, താഴ്വരകൾ, വെള്ളച്ചാട്ടങ്ങൾ അങ്ങനെ പ്രകൃതിരമണീയമായ കാഴ്ചകൾ ധാരാളം ഉണ്ടായിരുന്നു.തൂക്കുപാലം പോലെയാണ് അവയിൽ ചിലത്. . ഇതിന്റെ ഭംഗി കണ്ടപ്പോൾ 6000 രൂപ എന്നത് അത്ര വലിയ ചെലവായി തോന്നിയതേയില്ല. ഏറ്റവും അവസാനത്തെ സ്റ്റോപ്പിലേക്കാണ് ഞങ്ങൾ ടിക്കറ്റ് എടുത്തിരുന്നത്. മറ്റു ചിലർ ഇടക്കുള്ള പലസ്റ്റോപ്പുകളിലും ഇറങ്ങുന്നുണ്ടായിരുന്നു.